Sólmyrkvinn 12. ágúst 2026 á Vestfjörðum

Almyrkvinn 12. ágúst 2026 varir lengst í 2m 13s við Látrabjarg í Vesturbyggð á Vestfjörðum. Er það lengsti mögulegi almyrkvi á Íslandi. Ef vel viðrar eru því miklar líkur á að Vesturbyggð verði vinsælasti áfangastaður almyrkvaunnenda sem leggja leið sína á Vestfirði. Þetta er fyrsti almyrkvinn á sólu á Vestfjörðum síðan 30. mars 1131.

Árneshreppur og Kaldrananeshreppur eru einu sveitarfélögin utan alskuggans á Vestfjörðum. Almyrkvi sést því ekki frá Drangsnesi, Hólmavík, Djúpavík og Gjögri. Fólk sem þar býr er eindregið hvatt til þess að ferðast inn í almyrkvaslóðina.

Alskuggi tunglsins er yfir Vestfjörðum í 3 mínútur og 27 sekúndur. Hann snertir fyrst Straumnes á Hornströndum kl. 17:43:28 en yfirgefur Vestfjarðarkjálkann við Sigluneshlíðar við Barðaströnd kl. 17:46:54.

• Fjöldi íbúa innan almyrkvaslóðar: ~7300

• Fjöldi skemmtiferðaskipa sem koma í land á Vestfjörðum vegna myrkvans: Upplýsingar væntanlegar

Ferðalangar sem hyggjast fara til Vestfjarðar eru eindregið hvattir til að kynna sér vel upplýsingar frá Vestfjarðarstofu.

Tímasetningar sólmyrkva á Vestfjörðum

Gagnvirkt sólmyrkvakort af Vestfjörðum

Smelltu á gagnvirka kortið hér undir. Ör birtist sem vísar í þá átt sem myrkvinn verður á himni. Gluggi birtist sem sýnir allar tímasetningar nákvæmar upp á sekúndu, lengd almyrkva og sólarhæð. Þá sýnir kortið skuggavarp af landslagi kl. 17:45 miðvikudaginn 12. ágúst. Safnsvæði eru merkt inn á kortið sem en upplýsingar um umferðarstýringar koma þegar nær dregur.

Umferðarstýringar og vegalokanir á Vestfjörðum

Þann 12. ágúst 2026 hefst umferðarstýring kl. 12:00 og stendur fram yfir sólmyrkvann (19:00). Gera má ráð fyrir að hámarkshraði verði lækkaður. Vegfarendur hvattir til að sýna þolinmæði og gera ráð fyrir mun lengri ferðatíma. Fylgist líka með upplýsingavef Vegagerðinnar.

Á Vestfjörðum verða eftirfarandi vegir með tímabundna einstefnu:

• Örlygshafnarvegur (612) út að Látrabjargi. Fjöldatakmörkun verður við bjargið.

• Rauðasandsvegur (614). Líklegt að fjöldatakmörkun verði á Rauðasandi.

• Einstefna verður frá Barðastrandarvegi frá klukkan 12:00 þann 12. ágúst 2026. Eftir að atburðinum lýkur verður umferð stýrt til baka eftir sömu leið.

• Vegurinn upp á Bolafjall verður lokaður almennri umferð.

Heilræði fyrir þau sem verða á Vestfjörðum

• Nældu þér í örugg sólmyrkvagleraugu snemma. Gleraugnasalan okkar er fjáröflun fyrir fræðslu um myrkvann fyrir börn og fullorðna, Íslendinga og ferðalanga.

• Leggðu snemma af stað á áfangastað, helst daginn áður – dveldu næturlangt ef leyfilegt er og þú hefur tök á.

• Búðu þig undir mikinn mannfjölda ef vel viðrar, sér í lagi þar sem almyrkvinn varir lengst.

• Leggðu áherslu á aðgengi og góðan himinn í stað þess að einblína á lengd almyrkvans. Munurinn lengd almyrkvans á Patreksfirði og Látrabjargi eru aðeins 9 sekúndur en á Patreksfirði er öll þjónusta miklu aðgengilegri, þ.e. veitingasala, salerni o.s.frv.

• Dveldu lengur eftir almyrkvann og hinkraðu eftir að umferðin minnki.

• Fylltu bensíntankinn eða bílarafhlöðuna.

• Hafðu með þér drykki og nesti.

• Hafðu góð hlífðarföt með, sem og sólarvörn.

• Fylgstu með skýjahuluspánni og gervitunglamyndum á icelandatnight.is

• Nældu þér í öruggar sólarsíur á sjónauka eða myndavélarlinsur snemma.

• Lærðu einfaldar aðferðir til að fylgjast með sólmyrkvanum á öruggan hátt.

• Ef þú ert að upplifa almyrkva í fyrsta sinn mælum við ekki með því að þú eyðir tímanum í myndatöku.

• Ekki fljúga drónum. Drónar eru mjög óvinsælir meðal almyrkvaunnenda.

• Ekki leika tónlist á meðan almyrkvanum stendur.

• Fagnaðu eftir á, alveg sama hvernig viðrar. Þú upplifir þennan einstaka viðburð aldrei aftur frá Íslandi.

Almyrkvar á Vestfjörðum frá landnámi til ársins 3000

Frá landnámi hafa þrír almyrkvar orðið á Vestfjörðum. Frá 2026 til ársins 3000 verða fimm almyrkvar til viðbótar. Lengd almyrkva í listanum hér undir miðast við lengsta myrkva á Vestfjörðum:

• 29. október 878: 0m 32s við Látrabjarg

• 25. febrúar 1077: 1m 48s yst á skaganum milli Dýrafjarðar og Önundarfjarðar

• 30. mars 1131: 3m 41s við Aðalvík og Fljótavík á Hornströndum

• 12. ágúst 2026: 2m 13s við Látrabjarg

• 26. júní 2196: 1m 37s á Hornströndum

• 17. júní 2672: 1m 28s á Hornströndum

• 2. september 2817: 1m 11s á Hornströndum

• 7. september 2974: 2m 04s á Hornströndum

Frekari upplýsingar fyrir sólmyrkvann á Vestfjörðum

• Vestfjarðarstofa

• Vegagerðin

• SafeTravel

• Þetta þarftu að vita um sólmyrkvann 12. ágúst á Látrabjargi